Skip to content

الورشات الرقمية لموجودين خلال فترة وباء كوفيد-19

 

لمدة 6 أسابيع، بين 6 أفريل و 20 ماي، نظمنا ورشات عن بعد تقريبا كل يوم.

مجهوداتنا لبناء القدرات تركزت على مجالات متنوعة من بينها الفنون (نادي سينما “سيني اكزيست” عن بعد، موجودين عبر الكتب)، اللغات (كوير كود، اللغة الغير اقصائية)، نقاشات (نادي الفرنسية، نادي النقاش بالانجليزية، لمحة على أيقونة كويرية)، مهارات (الأمان الرقمي، فن الخطابة) و برشا حاجات أخرى.

الورشات الرقمية هذي عطاونا زادة الفرصة باش نعملو شراكات مهمة مع منظمات أخرى كيف مجموعة الورشات حول البينبة مع “المجموعة التونسية للبينيي.ات جنسيا ” و ورشات التحرير مع “ويكيميديا م.ع”.

فكرة الورشات الرقمية جات كيف لاحظنا أنو الأعضاء و العضوات و أصدقائنا و صديقاتنا ماعادش ينجمو يتمتعو بالفضاءات الامنة الي كانو يقربونا لبعضنا بسبب الحجر الصحي. عندنا سنين نشوفو كيفاش مجتمع الم.ع يشارك في الورشات و يبني من خلالها علاقات دعم الي تتطور مبعد لصداقات. ما حبيناش نخسرو الرابط السحري الي كان مخلينا قويين.ات لكن اضطرينا نسكرو المقر و نلغيو برامجنا. ما قعدلنا حتى خيار كان اِنّا نمشيو للرقمي.

لكن التبديل للرقمي كان باهي برشا. الورشات هاذم كانو هواء جديد لموجودين و مكنونا نتجاوزو الحدود الجغرافية و نتقابلو في العالم الافتراضي، نتعلمو و نكبرو مع بعضنا ككوميطة. مالاخر التحدي هذا كان من أحسن المغامرات اللي عملتهم موجودين.

ناخذو الفرصة هذه باش نشكرو كل الأعضاء و العضوات و الأصدقاء و الصديقات الي وجهونا في الورشات هاذي، نشكرو المدربين.ات و المسييرين.ات الي ورّاو تفاني كبير و التزام رغم الي حتى شي ما كان واضح. نشكرو المشاركين.ات الي خلاو من كل ورشة لحظات سحرية. نشكروكم.ن الي وريتونا معنى الحب في الأوقات الصعيبة.

ليوم تونس قاعدة ترجع بالشوية للحياة العادية. بما أنو وضعيتنا قاعدة تتبدل لازمنا نتأقلمو أحنا زادة. ما نجموش نواصلو الورشات بنفس النسق الي كانت عليه في الستة أسابيع الي فاتو. لازمنا نرتاحو، نوخرو شوية و نشوفو الأمور كيفاش تتطور. على قد ما تعلمنا مالورشات هاذم على قد ما نحبو نتعلمو من توقيفهم لفترة صغيرة.

في الوقت الحالي مازلنا ما نجموش نرجعو للأنشطة الحضورية على خاطرنا نحبو نحافظو على سلامتكم.ن. هذاكا علاش باش نواصلو في تنظيم أنشطة رقمية حتى يوفى وباء كوفيد-19 و نجمو نرجعو نشوفو وجوهكم.ن المزيانة. ردو بالكم على رواحكم.ن و نتقابلو على قريب.

Register Account

Have an account? Login here