موجودين في الجامعات

في اطار برنامجها لتبديل الراي العام و المناصرة قررت موجودين انها تتوجه المرة هاذي للطلبة و الطالبات في مختلف الجامعات و تتناقش معاهم.ن في كل ما يخص الهوية الجندرية , التعبير الجندري , الميل الجنسي و الخصائص الجنسية و هذا خاطر نمنو انو الطلبة و الطالبات هوما.ن المستقبل و الي تغيير العقليات بش يجي منهم.ن و كذلك لانو الجامعات هي من الفضاءات العامة الي لازم نكتسحوها بش نقولو الي احنا هنا موجودين.ات 

موجودين في المدرسة الوطنية للهندسة المعمارية ( الشاشة الكويرية )

في شهر فيفري 2020 اول نشاط كان في المدرسة الوطنية للهندسة المعمارية في تونس في اطار نادي السينما متاعهم و النشاط هذا امتد تقريبا على مدة ثلاثة اسابيع صار فيها عرض افلام قصيرة و طويلة الي سبق عرضها في مهرجان موجودين للافلام الكويرية و صارو نقاشات حولها مع الطلبة و الطالبات بحضور مجموعة من موجودين .

و صارت زادة ورشة على تعريف المفاهيم الي سبق ذكرها كيما الهوية الجندرية, التعبير الجندري , الميل الجنسي و الخصائص الجنسية .

موجودين في المعهد الاعلى للصحافة و علوم الاخبار ( في ضيافة الاتحاد العام لطلبة تونس  UGET)

وتوجهنا زادة  للمعهد العالي للصحافة و علوم الاخبار ايمانا منّا باهمية هذا المجال في تبديل تصويرة المجتمع الكويري في وسائل الاعلام في المستقبل الي ديما يتم تشويهها 

موجودين في اكاديمية قرطاج للفنون 

و في بداية مارس 2020 كنا زادة حاضرين.ات في اكاديمية قرطاج للفنون في ورشة ” شمعناها جندر؟” و تناقشنا مع مبدعي و مبدعات المستقبل على تعريفات المفاهيم الخاصة بالجندر .

الاكيد انو الورشات هاذي بش تتواصل و نتمناو انو تكون معممة في تونس كاملة و ما تتمركزش فقط في العاصمة 

 لأكثر معلومات أو كان عندكم استفسارات تابعوا صفحة الفايسبوك و الا ابعثلنا على البريد الالكتروني Contact@mawjoudin.org

انشطتنا في الجامعات  موجودين   بفضل مساعدة ممولينا و شركائنا و شريكاتنا و المتطوعين.ات